الجا الى الله ثم اليكم

السلام عليكم ورحمة الله وبركاته اخى وشيخى الجليل خادم الرحمن

انا رجل مصرى عمرى ٤٨ سنة وكنت اعيش لسنوات طويلة فى هولندا …. اكرمنى الله بزوجة صالحة من هذه الدولة ورزقنا ببنتين يدرسون حاليا فى الجامعة.
جئنا لمصر من ١١سنة لنستقر فيها بعد ان تركت وظيفتى كمحاسب مالى ومنزلنا ومستقبلنا والبلد الجميلة الراقية. سبب ذلك هو خوفى من الله عز وجل على بناتى من الوحل فى اوروبا واننا نربيهم فى مصر على تعاليم الاسلام و نوصلهم الى بر الامان وان ازوجهم من مسلمين يتقوا الله فيهم. وكل ذلك بتشجيع من زوجتى التى من الله عليها وهداها للاسلام بعد ان كانت مسيحية متشددة!
اعمل بالاستثمار العقارى الفاخر وكنت اشترى الشقق وابنى الفيلات الصغيرة واقوم بتشطيبها ثم بيعها لاجانب اوروبيين ليقيموا بها ….. الى ان اشتريت ارض كبيرة بالساحل الشمالى من ٨ سنين. اكرمنى الله سبحانه وتعالى بمشاركة اخى الاصغر منى ووفقنا ببناء فيلا كبيرة وفاخرة جدا لها حديقة كبيرة على هذه الارض واستثمرت فيها كل ما املك من سيولة مادية وساعدنى اخى الاكبر ماديا واستلفت كذلك من صديقين لى فى هولندا ومصر …. حتى من اختى الاصغر منى ما تملكه من مبلغ صغير جدا!
المهم الفيلا ( بلعت) كل الفلوس دى وبعد كده مش عايزة تتباع! …. اجتهدت اكتر فى تسويقها داخل وخارج مصر وما فيش فايدة.
اكتشفت من كام سنة ان عندنا مكان فرعونى تحت الفيلا وحديقتها وان اخى الاصغر منى شريكى كان يعلم قبلى ولكنه ما كانش عارف نعمل ايه. وصلنا بعد ذلك لشيخ وحدد المكان وبدا يتعامل فيه وبانا الحفر وفضلنا نحفر والشيخ يعمل ف جلسات وجلسات ويخوض حروب خفية كتيرة وتيجى انتقامات واعمال سحر علينا وعلينا وعلى واولادنا ومشاكل كتيرة وطبعا تكاليف كتيرة…. كل ده خلى حياتنا جحيم والدنيا سودا علينا وبعدين الشيخ سابنا وساب الشغل والحفر مرة واحدة وقال: انا شايف اننا مش حنعرف نوصل للباب! ….. ولكن للامانة هو لم يحصل على جنيه واحد لنفسه.
استغرقت هذه الفترة حوالى سنة ونص وبعدين وصلنا لشيخ اخر … شاف الفيلا واخبرنا ان المكان بتاعنا عمران باذن الله لكن مدخله ومخرجه وغرفه كلها داخل حدود الفيلا لكنها بعيدة عن الحفر اللى عملناه!!! …. وان الشيخ الاولانى امكانياته على قده! …. المهم هو عرض علينا اما الحفر من اول وجديد او اننا ممكن نبيع المكان( ع المقفول) بدون حفر وانه عنده مشترى ممكن يجيبه ويجييبوا معاهم جهاز الكشف والمسح وساعتها ممكن نخلص مع المشترى ونبيع بثلاثة ارباع القيمة وذلك فى خلال اسبوع على الاكثر.
اتفقنا معاه على اننا بنفضل البيع على الوضع الحالى لتجنب المشاكل والمصايب السابقة لكن للاسف الشديد منذ حوالى ستة اشهر وحتى الان لم يحدث اى شئ ولا خطوة واحدة.
كل ما ارجوه من العلى القدير صاحب الملكوت هو ان يوفقنا فى ان نصل الى مشترى جاد وموثوق فى تعامله لشراء المكان على وضعه الحالى …. فهل تستطيع مساعدتى اخى وشيخى باى شكل من الاشكال؟
بارك الله فيك ولك منى الفاتحة


Source: alanwar